上海閑話｜儲有明：“南派”猴戲與齊天舞臺

上海京劇院為慶祝建院70周年，由陳少云、史敏、王佩瑜領銜，帶仔六臺海派京戲晉京匯報演出，讓首都個戲迷大呼過癮。美中勿足個是，戲單里少了鄭法祥、蓋叫天開創個“南派”猴戲。

雖說京兆名角郝振基、楊小樓、李萬春、李少春，演猴戲也斜氣結棍，《安天會》《鬧天宮》儕是伊拉個拿手好戲。但“北派”猴戲搭“南派”猴戲，辣辣表演個路數浪，交關地方儕勿一樣。“北派”講究神似，舞臺浪個氣勢、威嚴缺一勿可，一招一式儕像長靠大武生，造型拗得筆挺。“南派”就講究形似了，演員拿身段收得煞煞小，活脫脫一個猢猻，動作、神態模仿得惟妙惟肖，把猢猻活潑、調皮、詼諧、可愛個個性，演得入木三分。鄭法祥打破傳統表演程式，創出“含胸、拔背、躬腰”等八項技法。伊演個猢猻戲，撥演藝界尊為“大圣戲”，每一次登臺，場子儕坐得滿滿當當。1926年，鄭法祥還受邀去日本演出，紅透半邊天，伊也是第一個把中國猴戲帶上世界舞臺個京劇表演藝術家。

鄭法祥教學留影

老早上海灘有“三個半滑頭模子”個說法，黃楚九就是其中一個。伊開了爿大世界游樂場，腦筋活絡得不得了，大世界里個哈哈鏡，就是伊第一個想出來個噱頭。看到猢猻戲介吃香，黃楚九曉得發財機會來了，就投資辣大世界旁邊，專門為鄭法祥度身打造了一座新劇場，起名“齊天舞臺”，專門演齊天大圣個戲。

齊天舞臺1928年落成，硬件是頂頂好個，勿但有機關布景，舞臺還會得旋轉。鄭法祥獨挑大梁，一個人、一臺戲，辣辣同一個劇場里演了三年多。從《孫悟空出世》演起，一直演到西天取經、歷經九九八十一難，足足演了九十幾本。一千多場演出，場場爆滿，創造了世界舞臺演出史浪個奇跡。

鄭法祥教學留影

當時上海灘還有一位演猴戲個名角，就是蓋叫天。伊唱戲個資格比鄭法祥老，但演猴戲出道比鄭法祥晏。蓋叫天有兩個兒子，張翼鵬搭仔張二鵬，也儕會演猴戲。伊拉父子三個加上鄭法祥，一起奠定了“南派”猴戲個表演體系。憑《孫悟空三打白骨精》出名個紹劇演員六齡童，還有上海京劇院個“開口跳”陳正柱，儕是“南派”猴戲個傳人。

老古話講得好：“花無百日紅，人無千日好。”再好個戲，天天看也要審美疲勞。黃老板看到“大圣戲”勿再像從前搿能介吃香，就把“齊天舞臺”改名叫“共舞臺”。意思蠻清爽：勿管是啥個戲、啥個演員，只要能賺銅鈿，就請過來演，迭只“臺”讓大家一道來“舞”。

原標題：《上海閑話｜儲有明：“南派”猴戲與齊天舞臺》

欄目編輯：史佳林

文字編輯：錢衛

本文作者：儲有明